O Bugarini an o pandžtodi vakergja kaj kergja atako upral i Viktoria Marinova , tečevizisko žurnalistka kaskoro mudaripa kergja bari internacionalno debata soske majanglal dikhlja pe sar likvidacia taro politikane motivia.
O Severin Krasimirov (21) si došakerdo kaj kergja seksualno atako thaj mudaripa ekstremno formaja upral i Marinova thaj sine an o pritvor.
O bugarsko nacionalno radio vakerel kana legaren le sine an o kriso ki diz Ruse ov kerel sine lafi e žurnalistoncar.
„Na džanav so ulo . Našti dav man akana sa an i godi. Gelum odori em khuvgjum la oj peli. Mangljum te džav mange ama oj astargja man” vakergja o Krasimirov e žurnailistonge ko holi ko kriseskoro ofisi, vakerel o Rojters.
„Oja došalo sium but mange bibahtalipe. Našti pakjav kaj kergjum akava” vakergja o Krasimirov rovljarde krloa kana pučle le o žurnalistia dali si le plani akava te vakerel le thaj anglal o Kriso.
Palo odova ov bašo Rojters vakergja kaj na sine pučlo te vakerel akale motivonge. Dži kote ovel krisime šaj te ovel savakteskere phanlipaja bizi šansa te ikljol taro phanlipa.
I Marinova (30) sine legarutni an i televizia an i emisia regionalno aktenge ki lokalno televizia an o Ruse. Olakoro trupo sine arakhle an o jekh parko trujal i len Dunav ko 6 oktomvri. I policia vakergja kaj sine mardi , sekusalno atakujme thaj muli taro tasavipa.
