I fotografia hulavdi an o FB kote dukhela pe kaj ko dujetažengoro JSP busi duj kontroloria marena jekhe manuše , šokiringja e dizutnen. Okova dive pa šoferi mukhlja pe te marel jekhe džuvlja. O čhave maren pe ko busia na ćhinavena . Asavke incidentia tari rig e bukjarnenge an o JSP isi but thaj kerel revolti ko dizutne.
O dizutne so sako dive istemalkeren o transporto e busencar svedokias si odoleske kobor nesave kontroloria si but vulgarno prekal o dizutne ko busi te arakhle len bizo buseskoro tiketo so na validiringje le. Ko than te hramosaren leske salde globa , vakeren kote majanglal kerena verbalno čhingar , thaj palo odova lokheste odova dialog chidela prekal o mariba, thaj seriozno kontaktia.
Numa na salde o kontroloria , o dizutne reagirinen thaj aso nalačhe komunikacia e šoferencar, kote ko divesa kana isi bari frekfencija taro vordona pe droma , ačhona ko desave buseskere stasionia, numa na phravena o udara e dizutnenge.
Okola so sako dive si ko busia vakeren kaj si but arogantno thaj nakulturno o šoferia ko privatno busia, so em pali reakcia taro dizutne ola palem piena cigara kana paldena o busi thaj keren dumani an o busi kote isi manuša.
Akava keren le beršencar thaj ni jekh na kerela reakcia em te lel desave sankcie. Našti vakerel pe kote isi aktia kana o dromarutne da ko busia si nakulturno em kerena provokacia ko bukjarne ko JSP , numa odova na trubul te ovel faktori te oven atakujme fizički o manuša so si an o busia.
