Te kergjem desave komparacie tari politikakiri scena thaj angloalusaribaskoro aktiviteto taro politikakare DJ-ija , so den sako fromasalde te legaren amen premal lengere note an o avutno mandati thaj te keren amenge party, kote amen ka khela, a ola ka kheden love thaj ka profitirinen.
O vokabulari so istemalkerel pe ko politikano meči sako drom si del lafui lačho dživdipa e dizutnenge si but lačhi muzika šunipaske numa trubul thaj funda te šaj te pherel o dendo lafi. Akana da si jekhutne sar anglutne alusaribaskere ciklusia, legaribaja tari maksima kaj i resarin opravdinel e akten.
Si li o socialno teleperavdi kategoria manuša an i makedonia si hohavdi kategoria so si ko politikano interesi jali alusaribaskoro konteksti.
O čorolipa an i akaja them si odokhare učo odokhar lungo periodi thaj odoleske odola persone so si astarde , akale čorolipaja ka ove teleperavde ko klientilistikano motivo.
„O digniteti trampingje i nota prekal i rakj: okola so mudarena ile heroia, o ordinirime čora ule biznis fela, a o jekvaš pismeno nastavnikia ule -ministeria.
A me agjaar hari !purane tabiatea” falinen mange desave aver moldipa tari muzika. Na sium nesavo abro fani tari odoja USB nevi muzika thaj laseria an i diskoteka. Me sium majbut baši jekh retro muzika, okola so “lrčinena” taro gramafonia ki forma taro purano lačho “vinili” – gramafonsko ploča.
Falinen mange avdive okova e rabotniko te dikhen le sar “gospodini – rajo”, a o neve “Rajoja – Gospodinia” te na ikeren pe ko baripa, thaj te čhiven pe ki funkcia e naciake. Falinen mange o bare kontrolirime manuša , a na čalmdžie so roden o baripa ko moderno trendi.
Falinel mange sa okova ambienti kana isi ma tromalipa andre ko mo vilo, thaj pohari dar taro manuša thaj o avutnipa.
Falinen mange sa okoal persone so aven te den suporto kana majbut valjani. Falinen mange manuša so hari rodena, a but dena. Falinen mange aver vaktia, a na FB mačomenia thaj internet voajeria. But aver bukja falinena, a majbut falinel mange – so falinav mange korkori mange!
But rodava!
