E themakoro ofiso baši statistika (TOS) planirinela te implementirinel i statistikani operacia gejniba e dizutnen dži ko 2020 berš thaj majpakjavutne odova ka ikerel pe bizi i grafa te sikavel piro etnikano preperutnipe e dizutnenge . I informacia an o intevrju baši Prizma notirinel la o Direktori e Ofisoske o Apostol Simovski.
„Tari statistikni opservacia o etnikano preperutnipa jali religia na khelel nisavi rolja, soske odova si trampimi kategoria, thaj me ka kerav zori akala duj bukja ma te ove an o kotor koi akaja avutni statistikani operacia, numa jekhutne ko kotor tari dajakiri čhib o persone ka oven identifikujme thaj notirime.
I čhib so kerel pe lafi an familia si kategoria so trubul te ačhol thaj odova ka registririnel pe. I čhib trubul anglal sa sebepi planiriba an i edukacia” vakerel o Simovski thaj dopherela kaj kotor tari akaja statistikani operacia trubul te oven thaj persone so na dživdinen an i them , te resel pe o numero kobor manuša isi avrial tari them.
„Kanonikane si kana neko na dživdinel pobuter an i them thaj odjavingja pe tari piri ardesa an i Makedonia. Numa niko odova na kerela le. odoleske amen na džana si li 200, 300 jali buteder mile selime manuša. E statistikane operaciajaj odova ka džanel pe.
Ka džanel pe sakone dizjake kobor manuša isi odothe, kobor momentalno nane odothe thaj kobor manuša gele peske ko majlungo vakti. Sa odova ka del suporto an o planiriba an i them” vakerel o direktori an o TOS Simovski thaj dopherela ko kotor tari statistikani operacia so majbut darala ka sikavel čače kobor manuša gelepeske tari Makedonia so si učo nivelo.
