O Govermento tari republika Makedonia ka del kompenzacia ko učipa taro 9.000 eura e familiake taro jekh Rom so mulo ko phanlipa telal nadžande faktoria.
O pukjiba si kotor taro avrokriseskoro phanlo lafi so sine avdive havljardo thaj čhivela agor e akteske mujal i Makedonia so legarel pe sine anglal o Europakoro kriso manušikane hakoenge panda taro 2014 berš.
I avrokriseskoro phanlo lafi sikavela fakti kaj o trendi taro asavke meribaskere aktia taro Roma , dujto majbaro minjoriteti thaj diskriminirime an i them. Ko 30 juli 2010 berš o 19 beršengoro Rom kote si identifikujmo sar R.A. startujngja te ikerel o 3 masekongoro phanlipa an i Gevgelia, ko utar e makedoniake. Sar narkomani o R.A. reslja leske metadonsko terapia kana khuvgja ko phanlipa thaj idoleske sine leske dendi sar diveseskiri doza. Ov sine thanardo korkoro ki kelia kote sine šov krevetia. O metadono trubul sine te ovel garavdo thaj ma te lel korkoro. Javinate ko 1 avgusto 2010 berš pohari taro 48 saatia sar reslja ko phanlipa ov sine legardo an o hospitali , thaj dok resel ko hospitali , pelo an i komathaj sine le ratvarina an o šero. I obdukcia sine notirime kaj mulo taro inbfekcia ko kolin, soske sine but bibahtale sastipaja o učo nivelo metadoni thaj barbiturati so phanle oleskoro dišiba, so kergje ma te funkcionirinen o organia.
O nivelo taro metadoni an o oleskoro rat sine efta droma majbaro tari normala. E Europakoro centariu e hakoenge taro Roma (ERRC) kergja suporto e familiake te resle o čačipa prekal o krisia an i Makedonia. Numa o aktia kriseske so dengja i paše familia ko makedonikane krisia na agorkerena sine. sar rezultati odolestar an o 2014 berš i famila suportoa taro ERRC dengja aplikacia naglal e Europsko kriso manušikane hakoenge. O aktia taro avrikriseskoro akti si garavde aktencar thaj odoleske o phanlo lafi našti sine te havljarel O Govermenti so del o love sar kompenzacia čhivel agor akale akteske, numa i šema taro asavke meribaskere aktia e Romenge an o makedonikane phanlipa salde so startujnena te sikaven pe. Ko 11 mart 2017 berš Andrias Redžepov , 21 beršengoro Rom mulo ko phanlipa ko Skopje. Oleskiri familai sine informirimi kaj mulo tari kombinacia metadon thaj diazepam, numa na sine dendo o raporti tari obdukcia, trujal so isi faktia kaj sine telal seriozno policakoro mariba ko periodo angleder te merel. Ko 22 mart , o Erdal Juseinov , 25 beršengoro Rom dat taro duj čahev mulo ko phanlipa ko Štip. Isi aktia kote vakerel pe kaj ov sine mardo tari phanlipaskiri policia thaj o doktoria em na den le sine but hajbaske. Ov da sine telel i terapia so dengja le o doktori ko vakti kana mulo.
Ko agorutni čipora ko 2 juni jana i 45 beršengiri Romani džuvli tari Strumica sine arakhlio muli ko skopsko phanlipa “Idrizovo” . I familia e mule romane džuvljake vakeren kaj oj muli sebepi tortura thaj mariba taro phanlipaskoro personali thaj nakerdo ko vakti tretmani taro phanlipaskere doktoria. E phanlipaskoro ofiso negirinela akala aktia tari i familia, argumentea kaj e romane džuvlja sine la bare seriozno sastipaskere problemia.
