E germaniakoro Bundestago havljargja e Srbia, Makedonia thaj Bosna thaj Hercegovina sar “thema taro siguritetno standardi” . Odova si kaj o rodaripa bašo azili , e themutnendar taro odola thema ka anen pe decizie ko majurgentno akcia.
Čhijbaja akala balkansko themen an i odoja lista” siguritetno”, anglutne si kerdo akti ko maripa mujal hovavne azilantia.
Odova dive o Bundestago angja decizia e neve kanoneske bašo themutnipa – čhave taro strancia so akana si len šajdipa te ovel len duplo themutnipa, numa telal šarti te oven biame an i Germania, te dživdinen odthe majhari 8 berša, jali majhari te džan sine 6 berš ki škola angleder te pheren 21 berš. Dži akana odola manuša trubul sine te anen decizia maškar germasko jali o pasporto taro ple biande thema kotar so aven olengere jeria.
Prekal o kerde analize tari organzacia e manušikane niamenge “ProAzil”, i Makedonia, Srbia thaj Bosna thaj Hercegovina si dur taro “thema siguritetno standardea”. O membria tari akaja organizacia vakeren kaj o etnikane minjoritetia thaj o homoseksualcia si teleperavde a o incidentia thaj rasistikane atakia si sakodivesa. But phareste si e Romenge.
Akaja organizacia vakerel si “hor diskriminirime, thaj teleperavel olengiri egzistencia – prosek dživdipa e Romenge an i Makedonia , si deš berš majhari taro proseko. O meripa e tikne romane bebenge si duplo pobari taro aver. Odola čhavebut phareste šaj džan an i škola” notirinen tari organizacia “ProAzil”
