Dovogjende romani bitolčanka i Emina Bajramovska duj tiken čhavencar dživdinela po droma. Kana angleder desave masekoa thabilo olakoro tikno kher, sako dive arkhela pe nadžanlipaja kote te džal e tikne duj čhavorencar. Jekh si le berš a o aver duj berša. Ko anglolausraibaskiri kampanja periodo kana o političarioa dena lafia dromenge, bukjake, bare plate, thaj aver i Emina nane la kher thaj ni buti. Ki bitolsko Karton mahala so sine olakoro kher a akana si thardo o dejba lafi bašo maklačho dživdipa dendo taro političaria
anglal o alusariba si sar fantastika filmi . “Keren desavi uči politika, a o čorole maren pe jekhe mareske. Te dav mi vota , nane kaske. Nane man Identifikaciakiri karta soske thabili sa aver dokumentencar an o kher. Numa te ovel man da sine nane te džav te dav mi vota. Niko na dengja man suporto. O institucie, iranen piro šero. mo rom si an o phanlipa thaj našti kerel khanči. Masekoncar sium bizo klher e čhavencar avrial. Numa akava bebe so si ano miro vogju ov si akana ko tato mande. ” vakerl i Bajramovska.
Persi periodo o dizutne duj droma kergje blokada e regionalno dromeske Bitola -Resebn soske ačhile bizi elektrika. protestiringje čhivgje bara thaj vordonengere gume thaj an o drom tharge jag. Akava kotor taro bitolsko romani mahala Bair sp si trujal o drom Prilep -Resen anglal o tunelo kaj i Bitola
anavkerel pe sar ” Paraštueskoro pani”. An i mahala sisi 2.000 Roma a ko 80 tikne khera si aver 400 Roma čorole.
Akaja situacia e lilale kherencar tari Karton Mahala an i Bitola si sar o akteria e romaneske taro Čarls Dikens . Numa an o odova romani ilustirime si o dživdipa e manušengoro ko XIX veko an i Britania, a p bitolačnia dživdinena duj vekia majpala ko asavke šartia. Dujšel Roma an i akaja čoroli mahala so si upreder o magistralno drumo an i Bitola, keren o khera so ka arekhen materialkea, cigle, malteri, kartoni, limi thaj aver lokhe tharibaskoro materiali.
Sar so lokheste thabljola o kartoni agjaar sig thabljona thaj o khera. Majbut taro Roma nalegalno si konektirime an i elektrika thaj si problemia e naponea. thaj keren pe bare jaga. O jag angleder desave masekoa thargja o kher taro Amida Demirovska, daj taro 4 tikne čhavore. Oj odolea so našti te parvarel olen, e majtikne dengja le ki institicia bizo jeria.
„Fundavno šartia dživdipaske nane amen. Siem an i jekh soba telal kirira, nane amne ni toaletro te džan o dčhave. Kote te nangjarav olen, sar te džan an i škola? Si man dekreto taro Socialno pa džav an o Lolo kriso te den man šeja, sako drom na” vakerel i Demirovska.
Nane kurko te nakhen a te na thabljol desavo kher. Taro EVN mangena legalno te istemalkeren i elektrikani energia, a o Roma roden beneficie tari them e socialno manušenge.
