O roma taro trin romane mahale an o Leskovac so si an o pašiba e centroske tari diz kote isi paše 6.000 Roma , so e mulen parunen an o limioria “Sv Ilija” an o romano kotor so si trujal o drumo so legarela premal o than Jajina.
Sebepi nanipa limoriengoro than parunibaske, o Roma e mulen parunen ko thana kote si parume o phureder familia jali trujal o tikne droma maškar o limoria so nakhena odothar. Phiribaja taro akala tikne droma ikerel pe sama ma te uštaven pe o limoria so but droma hutinen prekal odola thana. Akava e phure manušenge so džana ko limoria si sar “našajdutni misia”.
„O manuša nane len kote te parunen ple pašen , a i diz na kerel akcia te šaj keren pe neve parcele, soske o nevo limoriakere thana akana randena pe ki nevi lokacia ki privatno phuv kote isi gazdia odole phuvjake” vakerena o Roma.
O Direktori e JP Direkcia bašo urbanizam thaj tamikeriba Milenko Milenković vakerel kaj džanena akale problemeske taro nanipa limoriengere thana so si problemi e Romenge taro Leskovac.
„ Amen angjem decizia te kera plani te šaj faislakerel pe akava problemi e romane kotorea taro limoria thaj odova ka faisalkerel pe akava lungoberšeskoro problemi” vakerel o Milenković.
