„But marge man, bizo disavo motivo, trenirinen sine karate upral mande. Ko vakti kana maren man sine anglal o kontejneri, vakerav sine : Mukhen man dživdi, te dikhav me unukon.”- vakerel i Mileva Stojmirović (61) taro Zaječar so sine brutalno mardi taro duj manuša kana khedel sine maro so sine trujal o kontejneri, bizo desavo motivi.
– Chidingjum javinate paše ko 5 o saati dži ko kontejneri ko drumo te khedav o bajati maro so sako javin khedava. Angjum i količka dži ko kontejneri. Tegani ale duj terne uravde ko kalo. Sine len paše 20 berša.
Jekh olendar preja khuvgja man ko muj thaj dejbaja vika. Peljum thaj o duj džene khuvena sine man. Peljum tele ačhiljum ko šok thaj nadžanav so sine podorig. Sine man rata ko muj thaj ko nakh. Tegani gelepeske thaj mukhle man tele – vakerel i Mileva.
Kana aljum pi mande nesave manuša angje man dži khere kote mo čhavo o Dejani lehgargja man ko uaječarsko hospitali.
Sebepi o bare ratvarina i Mileva majanglal sine legardii ki Stomatološko klinika thaj palo odova ki Maksilofascialna hirurgia. Odothar vakerena kote sine la frakture ko upruno kotor e mueske thaj e nakheskiri thaj jakhengoro kokalo ko muj.
O zaječarsko policia kerel seriozno rodaripa. Nekobor manuša si ande ko informativno lafikeriba thaj udžarel pe te identifikujnen pe thaj te astaren pe.
Šajdutne si o manuša so kergje atakia te oven skinhedsia , prekal dendo identifikacia tari rig e Milevake.
