Avdive ko Šuto Orizari ko drom Demirhisarska uli bari jag kote saste thabilo jekh kher dži kote i bari jag astargja panda jekh kher.
Premal o lafia taro komšie, o kher sine tari daj thaj čhavo. Ko jekh taro khera bešela sine jekh invalidirizirimi phuri kote e komšiencar sine ikavdi bizo ratvarina thaj ko vakti. dži kote o aver kher sos saste thabilo sine oleakere čhaveskoro so momentalno dživdinel thaj kerel buti an i Italia.
Prekal naoficialno informacie i bari jag uli majpakjavutne tari defko ki elektrikani instalacia. Prekal o vakerina taro komšie, sine akhardi i ekipa taro Mujaljagakiri jekhin, numa lungo vakti trebela sine te aven ki dendi lokacia thaj odoleske thabilo o sasto kher thaj na resle te lokalizirinen akaja bari jag.
Akava jevend ule panda aver da bare jaga kote manuša bukvalno ačhile bizo ple khera. Alarmantno si so i jekhin baši Mujaljagakiri protektiva lungo vakti rodela pe lokacia thaj olake stasioni an i akaja komuna numa panda nane definirime statusi thaj lokacia olake.
