O Roma si etnosi so lokheste lela okova so si maškar o aver na Roma trujal olengoro pašipa. te šaj te dživdinel ko tromalipa bizi dar. A bizi dar majlokheste šaj dživdinel pe trujal i religia. Odoleske o Roma ko avdisutnipe džana ko religie thaj si majbare religiozno manuša, numa ko jakha avere manušenge ola si majbare nareligiozno grupa. Egzampli si o Kosovo: Sine bilačhe e Albanconge, e Srblienge, numa majphare sine e Romenge. Trujal so si muslimansko religiaja keren sine albansko čhib sine paše karakteristike e albanconcar , ola ni jekh drom našti oven Albancia. Našti te trampinen o teni thaj o tradicionalno romani nosia thaj tradicia sar so si o Herdelezi thaj i Vasilica.
Ko nakhle decenie majbut taro Albancia si an o Islam, o Srblie an o Hristianstvo keren zorali presia upral o Roma so ikeren pe dži ki tradicia, so šelberšipaja ikeren la napalal. O Roma keren sine i Vasilica, kote ni jekh aver etnoso na ikerel le thaj notirinel le sar so keren o Roma. Sebepoi o specialno tradicionalno keriba i Vasilica, buteder naRoma so dživdinen sine uzal o Roma thaj dikhindo sar keren i Vasilica, ola ki šala vakeren sine kaj an o Romano bajrako trubul te ovel thaj – papin. I Vasilica avdive keren thaj o hristiansko manuša, olendar o Srblie sar Srbikano Nevo Berš. O Roma so si hristiania, i Vasilica kerena la bizi dar thaj akahren e srblien sar misafiria. Numa so keren o Roma so dživdinen maškar o Albancia? O Roma- muslimania si len nakamipa maškar o aver muslimania akale diveseske. But droma o Roma čhinaven te keren Vasilica te manhgle te dživdinen bizi dar taro Albancia, thaj te džan bizi dar an i džamia ko vakti namazeske.
Numa presie isi thaj taro hristiania. sar egzampli o prševsko Roma muslimania deceniencar keren sine Hredelezi , aven sine ko khangira keren sine fešta. Numa palo pherdo decenisko adeti so keren sine o Roma ki odoja khangiri, akana o vranjsko episkopi Pahomie, na mukhel e Romen te keren asavke adetia tradicionalno an i khangiri thaj olakoro imoti, soske o Roma nane hristiansko religia.
Ov vakerel kaj odola Roma – muslimania šaj te keren ple adetia Herdelezeske ki odoja khangiri, numa valjani te len i hristiansko religia thaj ma te oven muslimania. Odova si zorea e Romen te keren hristiania. Odova akava vladika kergja le thaj ki Vranja.. Zorea kergja 200 romane famile te oven hristiania, thaj soske ko vakti taro desave baredivesa ov humanitarno arka dela sine salde okolenge so si hristiania, a na sa čorolenge.
Akate trubul te reagirinel i thewm ma te kerel pe disriminacia upral i funda- religia.
