Ko supstandardno šartia an o improvizirime thana, dživdinen 200 Roma ki nalegalno mahala kaj i purani fabrika “Sloga” an o Resen. Bizo užo pani pijbaske, bizi kanalizacia, but droma bizi elektrika. Deponie ko sa o riga, o čhave khelen an o gunoi thaj fekalie so avena ko polsko toaletia so si ki mahala . O Roma so dživdinen odothe si infektivno nasvalipa, infrekcie thaj vogjeskere virusia.
– Siem an o baro pharipa bizi kanalizacia, o čhave nasvaljoven taro pani. Si man kašuki čhaj, na lav socialno arka, sostar te dživdina? Dživdina ko duj sobe 12 džene, vakerel jekh Romni tari romani mahala an o Resen.
– Dživdinav an i jekh šupa, enja siem tikne čhavencar. Sar te dživdina odothe, akate o toaleti, akate i soba, vakergja javer romani džuvli. Ola vakeren kaj odothe o političaria salde kana isi alosaripa, vakeren thaj den lafia, numa ola majodorig dživdinen ko čorole šartia.
Savore so vakergje kaj ka keren akate , ni jekh na kergja. Rodaja taro dizjakoro šerutno te pherel o dendo lafi soske amare hangia ko alosariba dengjem oleske. Akava nane dživdipa, a kana valjani te alosarelbe, majangle aven akate. Kilogram varea thaj 1000 denaria ka našti pobut te hovaven amen, vakerel holjame jekh Rom.
Rodena ekvivalentno hulavipa socialno apartmania , ko objekti so si kerdo an o Resen. Ola vakeren kaj pheren sa o šartia taro konkursi.
‘ Odola aprtmania vakeren kaj si okola so si socialcia. Ake amen siem socialcia. Amen mangaja te arakha amaro niami. Te na dengje amen amen ka dža anglal o Govermenti sare barabutne ka sova anglal i komuna, vakerewn o Roma taro Resen
