Trujal o baro čorolipa faktea kote 85% taro dizutne len socialno, te imigririnen nane than. O manuša džan po nekobor masekoa te keren buti an i Italia thaj Germania thaj palem iranen pe.
But čorole numa but phralikane dživdinen o Makedoncia, Turklie thaj o Roma an o Crnik , majbaro gav an i komuna Pehčevo, jekh taro raritetno gava kote i politika thaj o čorolipa na peraven o barabutno dživdipa maškar o majpaše komšie so preperena ko trin diferentno etnikane jekhina.
Ko gav isi paše 800 dizutne. Olendar 75% lena socialno. Isi nekobor bukjarne ko konfekcisko kompanie ko Delćevo., numa ola gejnen pe ko naja. Paše 40% si Turklie, 30,7 Roma thaj 29,4% Makedoncia.
O komšie Makedoncia, Turklie thaj Roma , jekh uzal jekh tergon anglal i nacionalno kujna sako dive ko 11 o časo kana del pe hape e majčorolenge ko gav. Bilovengoro hajbe lena paše 100 džene. Trujal ko pharipa, ola si jekhutne thaj ki baht – barabutne kerge džamia thaj khangiri , a o čhave sikljon ki jekh škola.
– Amende nane hulavipa. Soske ka kera čhingara, so ka kera hulaviba, o čorolipa li? Kana isi alusariba daja amari vota, sako džanel ko kaske del pi vota kole partiake si. Ake akana trin džene siem ko astali, me sium Rom, akava dži mande Turko, a dži oleste Makedonco. Taro sa vakti o babine thaj o sunetia kera olen barabutne., thaj odova si thaj avdisutne divesencar da – vakerel o Uzair Adilov, ko vakti kana piel sine bira anglal i dukjana.
Ov si kovači , agorutno ko gav. O zanatia beršencar napalal pohari sa merena – akana niko na sivel pošom, na keren jambolie jali pošomale čerge. Salde i dukjana taro Uzairi si phravde udarea, thaj odoleske so o majphureder čhavo kerel o zanati.
Numa i jag so trubul te takjarel o sastrn majbut si ačhavdo, thaj raritetno khuvel o čekiči ki dukjana.
Sa o trin napala generacie, mo dat, oleskoro dat thaj mlo parapapu sine kovačia. Sar džanav mange džanav e unzegienge. Ama akana nane buti. Angleder kera sine plugia randibaske, rote bašo vrodona, nalbantia grastenge. Akana šaj kera desavo karmpi thaj tikne alatia. Sare akana kinen, niko na kerela – vakerel o Uzairi.
Uzal o gav isi but veša, čar isi šartia agrareske thaj stokake arakhiba, numa nane ko te kinel o thud, o kiral, o bakhre, o bale. O agorutne duj masekoja našaven e hajvanen soske isi len nasvalipa.
– Erati 5 gurumnja parungjem ki jekh rupa. E komšiaske e Dimitriaske taro jekh drom mule 30 gurumnja. Odova si baro ziani – komentirinen o gavutne.
I Ajra Rašidovska vakerela kote ambulanta nane, o doktori avel salde štarto di thaj odova dži ko jekvašdive, apoteka nane. Medikamentenge džana dži ko Delčevo jali Pehčevo.
Ko gav isi purane khera, numa isi thaj neve ko trin etažia, moderno. O terne džana ki sezonsko buti ki Italia , iranen pe thaj keren pe khera. Trujal o baro čorolipa o manuša na džana peske taro gav. O manuša džana nekobor masekoa keren buti ko aver thema palem iranen pe khere. Palem kheden pe ko gav, kote keren vorba ko trin čhibja.
