Nekobor divesa o Roma tari mahala Stočni trg ko Niš si bizi elektrika. O Roma tari akaja mahala tromale sikavgje plo revolto majanglal ki pli mahala, a palo odova anglal o ofiso tari Elektrodistribucia Niš, blokadaja o drumo.
Čhinavdi si i elektrika e 40 Romane familienge soske isi len borčia akale mahala premal Elektrodistribucia Niš.
Majbaro kotor taro Roma ki akaja mahala lena socialno thaj kheden plastično flaše.
“Ola si čorole, nane len buti thaj love bašo normalno dživdipa, a an te pukjinen i struja” akcentiringja o Igor Paunović, koordinatori romane pučibaske tari komuna Palilula.
Ko Niš isi trin majbare romane mahale kote isi 7.000 Roma thaj odova ki Beograd mahala, Stočni trg thaj Crven Krst.
Sa o mahale si bizi infrsatrukturno regulacia sar so si pani thaj kanalizacia thaj aver problemia. Sebepi asavke problemia o Roma tari mahala Crvena Zvezda ko 2015 berš, pobut taro jekvaš berša sine bizi elektrika.
Tari Eelektrodistribucia Niš vakerena kote baši infrastruktura an i elektrikani mreža an i mahala Stočni trg sine dende 15 milionia denaria te šaj kvalitetno te oven opservirime elektrikaja.
