Ki bari jag so ulo nakhlo kurko paše ko 01:45 o saati pali jekvaš i rakj ko drom Gruđanska 2 an o Beograd, phare ratvardo si o Murat Azirović (37) . Ov vordonaja tari Medicinsko arka legardo si ko Urgentno centro, oleskiri situacia si phari, numa si avri taro dživdipaskoro riziko.
Sar avilo dži ki akaja bari jag si misteria. soske akava tikno kher so thabilo saste na sine ni elektrikani energia. Trujal o kher thabile thaj aver duj tikne apartmania. O gazda e khereskoro notirinela kaj akaja bari jakg si čhivdi mangipaja te tharel pe!
– O manuša na mangen e Romen – vakerel i Jasmina Gaši, so akava thardo kher po desavo drom dela le sine telal renta. Frdena sine akate em bara, phagena sine mange o džamia, thaj šaj akaja bari jag si kerdi nekastar so namangel amen.
Ko momentia tari bibaht ko kher sine salde o ratvardo manuš. Sar naoficialno informacia si kote ov avel sine desavo drom te sovel akate, dži kote oleskiri paše familia duj e čhavencar renitinel sine i Jasmina Gaši.
-Sa thabilo, šeja, dokumentia – vakerela i Sabrina Jonusović. Me ko momenti kana thabilo o kher sium sine ki mi daj e čhavencar. Mi amalin havljargja mange kaj thabljola o kher. Kana resljum dikhava sine kote o manuša ačhavena sine i jag a e medicinakoro vorda legaren sine e Murate ko hospitalo.
Taro Urgentno centari vakerena kaj o Azirović si ko stabilno situacia.
– E ratvardeske pali kerdi reanimacia si legardo ko Intenzivno sasljariba , i situacia si phari , numa nane ko dživdipaskoro riziko – vakerena taro hospitali.
