Anglal o udara tari Ginekologia thaj akušerstvo (GAK) po 8 saatia mule fetusea an o vogji ake trin divesa i Nazmija Dalipi taro Gostivar udžarel intervencia taro doktoria.
Sebepi o akutno problemi o doktoria taro Gostivar bičhavgje ola an i Klinika baši ginekologia thaj akušertsvo an o Skopje, numa odothe vakergje kaj o termini si bašo trintodi thaj i čipota nane odokhar urgentno. I Nazmija darala bašo plo sastipa. thaj e čhavenge so mukhlja olen te arakhen len o komšie. Oj erati adžikerel sine anglal o hospitali thaj geli te sovel ko plo phral ko Skopje.
„Gelem ko mlo matično doktori thaj lelem i diagnoza thaj avilem akate. Mlo doktori vakergja kaj o bebe si mulo. Trin doktoria vakergje kaj o bebe si mulo. Dikhle man em vakergje kaj nane man dukha, nane man ratavrina, ka ave ko trintodi, thaj kobor si odova garancia me dživdipaske so šaj te infocirinav man thaj toksikacie te ovel , man isi man čhave” vakerel i Dalipi.
O ginekologo Aleksandar Blaževski vakerel kaj sako dive nakhlo mule fetusea an o vogji si riziko e sastipake ki džuvli.
„Kana notirinel pe kaj o fetusi si mulo trubul ko sig vakti ikavel pe o mulo bebe taro vogji . Na pakjava kote desavo ginekologo te vakergja kaj o fetusi si mulo, te ačhol ko vogji. Numa odova trubul te dikhel pe kobor masekoja isi e fetuse. Kana mulo fetusi startujnel te kirnjol isi riziko palo sastipa e dajake” vakerel o Blaževski
Taro Ministeriumi bašo sastipe vakeren kaj akale čipotake trubul te notirinen stručno manuša. I doktorka Aneta Sima so kergja kontrola e Nazmiake, vakerel sa dži kote i dovogjende džuvli nane la ratvariba, i čipota nene urgentno thaj riziko e pacienteske.
Link: https://www.youtube.com/watch?v=LKxyzyaW7JI
