O učo Kriso baši kazacia thaj jurisdikcia (UKKJ) an i Romania angja decizia kote o eks romaniakoro prezidento Trajan Basesku trubul te pukjinel globa taro 600 lei (paše 135 eura) bašo nekobor diskriminatorsko komentaria so dengja olen ko 2010 berš.
O UKKJ frdingja i irami aplikacia taro Basesku so zojrakerel i decizia taro Apelaciono Kriso an o Bukurešt taro juni 2014 berš. I Decizia taro Krisi si definitivno informirinel i Agerpress.
Ko masek noemvri 2010 berš o Trajan Basesku ko vakti tari oficialno vizita e Sloveniake vakergja kote baro numero taro Roma tari Romania dživdinen čoribaja, numa o legaripa an o Bukurešt našti ikeren len te džan tromale ko thema tari Europakiri Unia.
“Amen isi amen aver problemi so valjani te vakerel pe , a odova si integracia e Romenge nomadenge , so olendar but hari mangena te keren buti. Tradicionalno pobut olendar dživdinen čoribastar” vakergja o Basesku ko vakti tari pres konferencia.
An o fevruari 2014 berš , o Nacionalno Konsilo bašo maripa mujal diskriminacia angja decizia te kerel pe globa bašo Basesku ko učipa taro 600 romansko lei, notiribaja kaj akala komentaria taro prezidenti sine diskriminatorsko thaj phagen o manušikane niamia e Romenge thaj olengoro digniteti.
O trajan Basesku an i funkcia Prezidento e Romaniake sine deš berša ko periodi taro 2004 dži ko 2014 berš.
Link: http://www.romania-insider.com/romanias-former-president-fine-discriminating-comments-roma/168033/
