Ko 30 marti 2016 berš an o Parlamento sine dikhiba baši demografsko kriza. Prekal i žurnalistikani agencia Fokus o dikhiba sine prekal i inicijativa taro partia ABV. Ko odova dikhiba than lele o vicepremieri thaj ministeri baši sociala Ivailo Kalfin, o Georgi Prvanov prezidenti e Bugariakoro ko periodi 2002 dži 2012, akanutno prezidenti an o ABV, oleskoro vice prezidento Rumen Petkov thaj o prezidento taro VMRO Krasimir Karakačanov thaj lideria aver partiendar sar so si “Bugariakere socijal demokratua “BZNS” Aleksandar Stamboliski.
I resarin akale dikhipaske sine o pratie te keren barabutno pozicia an i konekcia e avutne Konsultativno Konsili nacionalno siguriteteske taro prezidenti Rosen Plevneliev. O VMRO dengja dokumenti e Kalfineske taro 18 riga anavkerdo sar ” Memorandumi bašo maripa mujal demografsko katastrofa”. Dži akava momenti o vicepremieri Kalfin na kerel distanca taro VMRO idee. Palo dikhiba o Kalfin, Parvanov thaj Karakačanov dengje barabutno pres an o Parlamento.
An o memorandumi zojrakerel pe kaj isi daravina e etničko konflikteske an i Bugaria. Vakerel pe kaj o bugarsko Roma nane len pli dajakiri them, dži kote dajakiri them e bugarsko Turkenge , i them si olengiri i Turkia. Ko akava čhani o VMRO vakerel kaj o bugarsko Roma thaj o bugarsko Turkia si jabandžie, thaj i Bugaria nane olengiri them. Kaste isi hairi asavke politikatar?. Soske o Prvanov thaj o Kalfin dena barabutni pres konferenciua e Karakačanovea?
