E germaniakoro parlamenti erati hangingja neve kanonia te oven majzorale aktia bašo azili te šaj tingjarel pe o nivelo taro migrantia an i them. O paket kanonia konektirinel thaj i restrikcia te šaj te kerel pe jekhipa maškar o familie – te konektirinen pe, thaj sine votimo butipaja taro 429 hangia thaj 147 sine mujal.
O neve kanonia anen thaj lokheste deportacia taro krisime strancia – konsekvenca so sine dendi palo okola čipote neveberšeske an o Keln kana šel džuvlja sine atakujme thaj maltretirime tari grupa migrantia.
Prekal o neve kanonia nesave migrantia našti anen pe paše familia an i Germania ko periodi taro duj berša . Akala akti ka oven okolenge so si irame o aktia bašo azili numa našti oven deportirime soske isi riziko tari olengiri tortura jali meribaskiri daravin an i pli them.
I šefica opozicisko frakciake taro Hariale , Katrin Gering – Ekart dengja kritika vaši pozicia soske hulaven e paše familia thaj na ikeren sama e tikne migrantenge jali keren o korkori azilanti te pukjinen o kursia baši integracia.
“Akava nane planski kerdo, akava si haosi thaj panika” vakerel i Gering – Ekart.
O Jan Horte tari partia Levica anvakergja akala kanonia sar “anti-azil paketia” kote indirektno del niami okolenge so kerena protesti mujal o migrantia
O govermenti khelel pe e manušikane dživdipaja dena sine kritike thaj tari organizacia “Pro Azil”. I legarutni partia CDU thaj SPD ikeren sine i decizia. O Ministeri baši Jurisdikcia Hajko Mas taro SPD thaj e parlamentarno themakoro sekretari Ole Šreder taro CDU notiringja o aktia sar validno te šaj ikerel pe o kapaciteti okole manušenge kaske trubul čačutni arka. O Govermento mangel “lungo vakteske thaj džando” te tiknjarel o numero taro okola so si imigrantia notirinel o Šreder.
Ko avutno periodi ka kerel pe majisg decizia palo aplikacia taro rodaripa azili thaj ka keren dopherde centria bašo procesuiripa e aplikacienge taro “ekonomsko azilantia” so majodorig da isi len tikne šanse te ovel len statusi imigrantia.
