Dživdipa sar ki kutia, ki phuv thaj ko phravdo. Agjaar šaj notirinel pe o dživdipa e 9 dženengiri famila Durakovi. O temeprature si telal i nula, 8 čhave thaj olengiri daj sovena ki phuv, a upral o šero isi len salde najloni , so si pakjardo ivea thaj biršimea so dela ko akava periodi e beršeske. I Romani džuvli i Abdije thaj olakere čhave dikhen suno phravde jakhencar kaj šaj te ovel olen kher sojbaske, soske i koliba si kali thaj na dikhel pe ništo. I Durakova si bizo kher, pandž berša dživdinel ki akaja improvizirimi koliba učhardi daskencar thaj najlonia. Bizo džamia, bizi elektrika, bizo hajbe. Oj lela salde 50 eura socialno arka.
Angleder lela sine paše 100 eura, numa akana sig o socialno si tiknjardo bašo 50%, soske premal o kanoni lela socialno pobut taro 2 berš. O Rom tari 38-beršengiri Abdie si ko phanlipa, a arka na lel ni olakoro 19 beršengoro čhavo , soske si kašuko, thaj nadžanel i čhib taro kašuke, thaj i komunikacia si leske but phari. Ki akaja familia isi panda jekh čhavo so si psihičko nasvalo, 18 masekongiri bliznako , so našti te mrdinel po vast thaj po pro, numa te legarel la ko doktori e daja nane la love.
O komšie e Abdiake dena arka po desavo drom, ušharen te sine desavo phravdo duvar an i koliba, jali ka kheden lake pračke te šaj takjoven, numa bičhaven apel dži ki them te šaj akale romnjake arakhel pe desavo arka, soske dživdinel bukvalno ko phravdo than.
I Abdie mangel hari tato thaj lačho than akava berš. Olakere čhave ni jekh drom na lošangje bašo poklonia, thaj salde džana thaj mangen devlenge. i 38 beršengiri romni thaj olakere čhave majodorig sovena ki phuv kana i temepratura si telal o minusi, i them na arakhel lake desavo than, a i Abdie Durakova mangel samo hari tato than ko akava berš.
