O nevo berš notirinel agor taro jekh thaj starti taro jekh nevo ciklusi an o dživdipa ko manuša. Akava si dive so dela šajsarin neve startenge, te koregirina o greške so kergjem len thaj te kera neve ambicie thaj planoa. O nevo berš kerel pe sakote an i lumia ko diferentno thaj po desavo drom interesno forma.
Ekvador
An i akaja them tari Latino Amerika o manuša kheden pe točno ko Nevo Berš thaj tharena sa ple fotografie so notirinen nesavo ekstra kerdo akti ko berš so nakhlja. Ola ki asavki froma frdena o rui odole manušengiri taro fotografie so sine phanli an o fotografie.
Čile
Ko Santiago i šerutni diz an o Čile baro numero manuša angleder i jekvaš i rakj kana avel o nevoberš , stolicencar, hajbaja thaj pijbaja džana ko limoria. Ola odori startujnen o nevo berš barabutne olengere majpaše mulencar.
Danska
O Dancia ko thavdipe saste beršeske khedena o tanjiria so ki neveberšeskiri rakj frdenalen anglal o pragia taro khera pe majpaše amalenge . Okova so ka arakhel majbut phage tanjiria anglal plo udar odova sikavel kaj sine le majbut amala so mangle leske Bahtalo nevo berš.
Austria
O austriancia isi len adeti ko dive angleder o Nevo Berš te topinen olovo thaj te čhoren le upral jekh tanjiri panjeja pherdo. Premal o fugure so ka oven kerde taro odova olovo ka sikavel pe lenge i jazia ko berš so avela. O forme sar topke sikavena baht, okola sar pobare špiciia sikaven kaj trubul lenge suporto – pomoš, a te sine formirime nesavo križo – krsto odova sikavel ka merel neko tari familia.
Portoriko
O dizutne taro Portoriko pakajana kaj o purano berš trubul te thovel pe, te šaj ko nevo berš te oven čisto. O dive angleder o Nevo Berš ola čistinene em sredinena o khera, a angleder i jekvaš i rakj thoven pe ko legeni thaj o pani frdena le tari i pendžerka, te šaj o melalipa džal peske e purane beršea.
