Paše bašo duj čhona i diz Niš ka trubul te arakhel lokacia kote ka kerel 50 khera e Romenge so akana dživdinen an i romani mahala Crvena Zvezda . Akava pučiba kherea e Romenge so dživdinen ko bilačhe šartia an i mahala ka faisalkeren pe , sar so vakerena tari diz lovencar taro EU fondia numa si napendžardo kana o procesi tari dislokacia ka agorkerel.
E dizjakoro šerutnob e komunake Niš o Darko Bulatović čhivgja signatura an o protokolo vash butikeriba e ministeriumea bašo tamikeriba Zorana Mihajlović kote si akcentirime kaj ka kaeren pe khera bašo 110 romane familie.
O protokolo so si parafirime si importantno soske faisalkerel pe akomodiaciakoro pučiba e 110 romane familienge . An o akava proekto kergjem buti duj berša thaj lačhipaske i diz havgja amaro problemi odoleske so saste konekciajaj taro lokalno institucie na ka šaj sine lokheste te kera inkluzia e romane familienge ko normalno dživdipa sar so isi e aver dizutnen – vakergja i Mihajlović.
Kote ka ovel i lokacia ka oven konsultirime o dozutne tari romani mahala Crvena Zvezda.
Liparibaske si kote akava nane jekhutno proekto ko faisali e problemeske khera thaj o Roma an o Niš so akana dživdinen an o nahumano thaj nalegalno šartia an o akala mahale. O akti sar tenderi si phravdo te keren pe akana 25 khera bašo 50 familie tari mahala Stočni Trg, a o proekti kergja reakcia ko dizutne taro gav Medoševac.
O Roma tari mahala Crvena Zvezda beršencar napalal si len problemia e elektrikane energijaja thaj nekobor drpma kergje protetoa thaj blokada e dromeske Dušan Popović. soske masekoncar na sine len elektrikas sebepi o napukjime borčia.
