Prosečno i romani džuvli majanglal ka hulavel pe tari prandin sebepi i sasuj a nae te sine švalerka e rome.
Duj familie ko jekh kher bajrarel i šansa kaj šak “bahtale te dživdinen dži ko agor e dživdipaske” jali ka džan ko kriso te hulaven pe. O duj diferentne karakteria, plania, so isi e rome thaj e romnja majbut panda ko avgo dive sikaven pe.
Dživdipaja ko jekh than e ternen nane len šajdipa te buvljaren komotno plo dživdipa. Štardženengiri famiulia so si len prosek love dživdipaske phareste šaj te ačhol, odleske o jeria ekonomsko den suporto thaj odolea avtomatski heminen pe ko dživdipa e ternengoro a odolea keren kontra efekti.
I statistika sikavela kaj i švaleracia si potikno faktori te hulavel pe i prandin soske sar so vakeren o socialno ekspertia ekstra ko romane mahale o romnja panda legaren pe prekal o stereotipia.
So legarel pe dži ko relacie an i familia šaj te vakerel pe kobor e ternen nane len respekti premal o phureder, odokhar o phure na den odova niami ola te anen korkoro decizie , esktra kana si ko pučiba desavo barabutno intereso.
Klasično egzampli tari dominacia si , me dav tut te šaj dživdinena , ama me ka vakerav so ka keren , a majubit olendar si o sasuja so ko ple lafia but droma nane havde e ternencar. O terne bukvalno prekal i rakj valjani te adaptirinen pe ko neve momentia dživdipaske thaj o neve momentia kaj si akana rom, romni, džamutro, bori. daj thaj dat.
