I Iniciativa e džuvlengiri taro Šuto Orizari zorale kerela reakcia an i havljarin te del pe tenderi te kerel pe pharvdo bazenti nanjaribaske an i Komuna Šuto orizari havljarde an i Agencia bašo terne thaj sporti ko učipa taro 600.000 eura.
Lungo periodo akaja Inicijativa alarmirinela kaj an i komuna Šuto Orizari nane personalno ginekologo, a 8.000 džuvlja so si an o reproduktivno periodi. Aso o informacie taro sakodiveseksre terensko rodaripa tari Iniciativa na i Komuna Š.Orizari sebepi limitirimo avipa e primarno sastipaskere protektivake but fare o džuvlja bianen an o kherutni atmosfera bizo doktoreskiri opservacia , kote olengoro sastipa thaj e bebeskere sastipa si seriozno čhivde telal daravin.
Aso oficialno statistikeo meriba e bebengere ko Roma si 1.5 droma majbut ki paralalea aver dizutnencar thaj akale deciziaja akava nivelo nane te tiknjarel pe. Akale nafunkcionalno investiciaja , o reporduktivno satstipa e Romane džuvljake palem si čhivde an i rig , a o socio-ekonomikano statusi e dizutnengoro an i komuna panda dopherdo si bilačho.
O Roma an i R.Makedonia dživdinena ko but bilačhe šartia ko baro čorolipa thaj učo nivelo bizi buti, o romane čhave si bokhale, si len bilačhe šartia dživdipaske thaj limitirimo avipa dži ko sastipaskere opservacie. But hari dela pe an i olengiri edukacia , deiba ospervacioa e seksualno thaj reporduktivno sastipa thaj sate lačharipa e dživdipaske.
Ko avipa e sastipaskere protektivake o Internacionalno Komiteto vash ekonomikane socialno thaj kulturakere hakoa dengja propozalo i tehm te kerel zori te arakhel ginekološko opservacie sa e džuvlenge bizi diferenca taro than dživdipaske, te šaj oven doktoria thaj buvljaripa an o aktivitetia so učharena o Fondi sastipaskere siguriteteske an i RM. Resarinaja te lačharel pe o seksualno thaj reporduktivno sastipe ko Romane džuvlja
O Komiteto dengja propozalo te len pe sa o forme konsekvence te bajrol o numero taro ginekologia an i them resarinaja te šaj sako džuvli te resel dži ki ginekološko opservacia , a ekstra an o Šuto Orizari.
An i programa vash aktivno sastipaskir protektiva e daenge thaj čhavenge baši 2017 berš ando taro Makedoniakoro Govermento den pe 240.000,00 denaria – 4.000 eura te ovel ginekologo jekh drom an o kurko ki primarno protektiva an o ginekologia thaj akušerstvo an i teritoria e komunake Šuto Orizari . Ko than akale nafunkcionalno thaj paušalno faisali , bašo 20.000 eura o problemi nanipa personalno ginekologo e džuvlenge an i akaja komuna ka ovel saste faislakerdo odolea so personalno ginekologo ka kerel sako dive an o berš.
I decizia te kerel pe bazenti na salde so nane elokventno e urgentno opciake e dizutnenge an i komuna Šuto orizari , numa putrela o pučiba a avutne prioritetenge taro ofisia kana si o lafi e dizutnenge tari romani populacia.
Sikljoviba panjeskere sportia thaj o sastipa e džuvljakoro si diferencialno kategoria taro aspekti urgentno thaj zaruripa. Faktea rodela pe taro institucie te prekontrolirinen o prioritetia e dizutnenge an i komuna Šuto Orizari thaj te locirinen o resursia so ka čaljarel i egzistencia bašo majlačho dživdipa
