Ola vakerena kote baši jekh decenia nane manuše kaste na lošarkergje, numa salde jekh albumi kergje, soske dujto albumeske na sine len love.
– Šaj vakerava kote siem jekh taro majrodime orkestaria, nane amen jekh dive pausa, numa nane amen but love te kera dujto albumo. Saste vakteske kobor so funkcionirina kergjem jekh albumi, numa nane amen sponzoria te šaj kera thaj dujto. Pharo si o vakti. Pakjaja kaj ka aven majšukar vaktia. odoleske akana siem stacionirime majbut ko familijarno manifestacie an i them thaj avrial olatar. An i Grcia sar te siem odothe ničale.
Sako berš an i Nord Grcia bašavaja ko buteder karnevalia an o buteder dizja – vakerela o Aleksandar Janušev, frontmeni an o orkestari.
O Aleksandar vakerel kote aso olende ola si majunikatno orkestari.
– An o orkestari siem 8 džene kote salde me sium Makedonco, a sa o aver si Roma. Numa amen siem sar jekh familia. Me sar majpurano an o orkestari bašavav sine olengere dadencar angleder , a akana o orkestari si majterne generaciencar. Akale 10 beršenge kobor so akana funkcionirina akale dženencar ,, numa salde trampina o generacie kana avel odoleske vakti. Me sium majphureder savorendar kote si man 50 beršengiri kariera – vakerela o Aleksandar.
