Aso o Pržinsko Kontrakto thaj phanlo kontrakto maškar o 4 majbare politikane partie an i Makedonia, avdive an i teritoria tari R.Makedonia ikerena pe o Anglovakteskere Parlamentarno alusariba. E hangibaskere thana an o sa šov alusaribaskere jekhina an i RM ka oven phravde taro 07:00 saati, a ka phanen pe an o 19:00 saati.
Ko akala alusariba aso o TAK isi registririme 1.784.416 dizutne niamea bašo dejba vota.
Bašo 123 thana na i Paralemnto ka oven 11 politikane partie thaj koalicie. Odola si: PDP, Koalicia baši trampa thaj jurisdikcia, Liberlano Partia, Levica, DPA, Koalicia taro SDSM, BESA, Alijansa e Albancongiri, Koalicia VMRO DPMNE, Koalicia VMRO baši Makedonia thaj DUI.
An o konkecia bašo regulariteti ko akala alusariba sar kherutne opservatoria tari TAK si akreditirime 7.585 opservatoria. Avgo drom an o alusaribaskoro proceso si konektirime thaj 143 Romane opservatoria.
Sar internacionalno opservatoria si 667 džene, thaj 354 translatoria.
Sar mediumia trujal o kherutne žurnalistikane ekipe isi akreditacia thaj internacionalno mediumia. Olengoro numero si 75 žurnalistia, kote majbaro numero si i ekipa tari Al Jazaira Balkan so gejnela 16 džene.
An o akala alusariba plo than len thaj o romano politikano bloko. Majabro procento taro romano politikano bloko si an i koalicia e VMRO DPMNE-a thaj an i olengiri lista arakhela pe thaj o lideri an o SRM Amdi Bajram so si an i 5-to pozicia an i AJ2, a i koalicija SDSM kaskoro membro an o SDSM an o AJ 2 an i 7-to pozicia si o Kurto Duduš, a o presidento taro PCER o Samka Ibraimovski an i AJ5 si ki 11-to pozicia.
