Naujrariba, harniba – kasniba jali iraniba e ujraribaske, našaviba e bagažeske- si majaktuelno problemia so arakhen pe o dromarutne ko aeroplania. . Sa akaleske šaj te rodel pe kompenzacia tari kompania. E europakere regulative taro akava biznisi saste implementirinen pe thaj an i Makedonia.
O Ujrariba nane ko vakti – so šaj kere?
Pijbe, hajbe, bilovengoro telefonsko komunikacia thaj internet. Akava trubul te ovel rezervirime tari aviokompania te sine kasniba e ujraribaske. Akala niamia si athinale tari korkoro destinacia. Okla so ujrana dži ko 1.500 kilometria te sine o kasniba taro pobut taro duj saatia, o ujrariba taro 1.500 dži ko 3.500 majlungi kasniba taro trin saatia, okola destinacie so si upreder taro 3.500 kilometria te kasninagja 4 saatia.
Dži kote o aeroplani na ujral ni palo pandž saatia, o dromarutne trubul te roden te oven lenge saste irame o love taro bileto. Kana o odložiba e ujraribaske si prekal i rakj, e dromarutnen si len niami tari aviokompšania te roden hotelsko akomodacia thaj transferi dži ko hoteli.
Te sine i definitivno destinacia resel pe kasnibaja taro trin jali pobut saatia trubul te ovel kompenzacia sar te na sine o ujrariba , salde ki čipota i kompania te šaj sikavel o fakti soske kasningja taro desave aver faktoria.
Te na mukhlja pe e dromarutneske te khuvel an o aeroplani taro aver faktoria, leste si le niami te rodel kompenzacia ko love taro 125 dži ko 600 eura, ko athinalipa kobor si dur i destinacia.
Te našavgja pe o bagaži kompenzacia dži ko 1.200 eura
Te na sine nikote o bagaži odova notirinela pe ko ogiso bašo našavdo bagaži te del pe hramosardo akti.
“O dromarutno trubul e avio tiketea te notirinel kaj si nađavdo oleskoro gepeko an o ofiso , o ofiso trubul te kerel lista bašo nareslo bagaži, elektronski te locirinel le thaj te počminen te roden le. O bagaži palo odova ka ovel dendo e dromarutneske ki kherutni adresa so si obligacia e kompaniakoro” vakerena taro ACVP.
Dži kote o bagaži thaj palo efta divesa nane arakhlo e dromaurutneske si le niami te pukjinen kompenzacia maksimalno dži ko 1.200 eura.
Te reslja o bagaži zijankerdo jali nane bukja ko bagaži o dromarutno trubul taro ofiso te phraven akti bašo zijankerdo bagaži.
Žalba majanglal dži ki aviokompania thaj palo odova dži ko ACVP
Dži kote o dromarutno si ko akti kaj si teleperavde olengere niamia majanglal trubul te den jekh akti dži ki aviokompania a palo odova dži ki Agencia baši civilno aeroujraiba (ACVP).
„O dromarutne so pakaja kaj si len validno argumentia mujal i aviokompania sar namukhiba an o aeroplani, akomodacia ki potele klasa, naujrariba jali eventualno kasniba ko ujrairiba, majanglal trubul te den jekh asavko akti dži ki aviokompania so operiringja akale ujraribaja. Odoleske šaj lel pe formilari so šaj arkahen le ki rig taro ACVP. Dži kote i aviokompšania na del antvorto ko akava akti ko roko taro šiv kurke paj te den dži amende” vakerena taro ACVP.
