Taro akana sa okola phagiba fundavno manušikane hakoa upral i romani populacia an i Makedonia ka šaj notirinen len an i web platforma “Romamap”, so sine promovirime taro Helsinško komiteto manušikane niamea. O proketi si finansirime tari Ambasada e Germaniake an i Makedonia, thaj ko proekti si konektirime nekobor dizutnengere organizacie so kerne buti ko problemia so arakhena pe o Roma an i Makedonia.
– Bibahtalo si o fakti kote palo odokhare berša o Roma an i Makedonia arakhen pe phagibaja taro olengere fundavno manušikane hakoa – vakergja i direktorka taro Helsinško Komiteto Uranija Pirovska thaj dophergja kote isi čipote kaj o Roma našti panda te keren personalno identifikacia,našti te legalizirinen ple khera thaj te ovel len kompletno sastipaskoro tretmani.
I Pirovska došpervalea e themakere institucien kote nane len politikano mangipa te lačharel pe i situacia e Romencar thaj o aktiviteto taro NGO si sa bizo efekti sebepi naaktiviteti e themakere institucienge.
O Zekir Abdulov taro NGO “Kham” taro Deločevo so si aktivno tari Purabali Makedonia akcentiringja kote bašo tikno vakti aktivistia taro o organizacie notiringje 61 aktia so si kerede bilačhipa e Romenge.
– Si amen akti kote isi kaj tikne Romane čhave si marde taro bukjarne ko škole, na del pe lenge lačhi sastipaskiri protektiva, thaj namukhiba te ikljon taro thema, so si limitiriba ko olengoro phiriba- vakergja o Abdulov.
Aso o lafia taro NGO sektori an i Makedonia isi baro numero Roma bizi personalno identifikacia trujal so oficialno informacie kerel pe lafi bašo asavke maškar 500 dži ko 700 manuša.
– O akti tari personalno registracia thaj ikaviba dokumentacia si but inertno thaj isi asavke da čipote kote duj čahve mule angleder te oven registririme ko lila bianipaske – notirinen ola.
