E britaniakoro bokseri Tajson Fjuri margja e boksere tari britania o Dilijan Vajt ki 6-to runda taro meči titulake ko stadioni “Vembli” ko London te šaj arakhel I šampionsko kustik ki phari kategoria ki WBC verzia. O 33 beršengoro Fjuri odolea notiringja piri 32 viktoria ko profesionalno boksi em ačhilo bizo te našavel desavo meči.
Angleder akava boks meči ov vakergja kaj o meči mujal o Vajs ka ovel oleske agorutno. “Dengjum lafi me šuže romnjakei Paris kaj akale mečea ka agorkerav mi boksersko kariera” vakergja o Fjuri.
Numa I Paris vakergja kaj akava šaj ma te ovel agorutno meči e Tajsoneske . “Mangav te čhinavel. Ov na trubul pobuter nikaske te sikavel pe kaj si šampioni. Šaj salde te sine organizirime desavo meči kote ka kerel pe uniba e duj verzienge. Odova šaj te ovel salde jekhutno faktori te šaj iranel pe ko ringo”vakergja oj.
O Fjuri akale mečeske inkasiringja paše 32 milionia dolaria.
O Tajson Fjuri si bijame ko Mančester, Britania ki familia taro irsko Travelsoa.
Oleskoro dat dengja le anav Tajson prekal o boksersko šampioni o Majk Tajson. O Fjuri si garvasialo sebepi pire romane darhie.
„But sium garvasialo odova so sium” vakerel ov bašo pire darhie. “mangava so sium Rom.. Miri familia dela man suporto em telokeriba em mangipa te legarav o viktorie em ma te ovav tele. Na darava nikastar. Sar Rom niksana na peljum pišmani niptoske. Dažanav so kerava em sar te kerav majodoriga” vakergja ov anglutne.
