Paše jekh milioni Roma dživdinen an I Ungaria thaj buteder olendar si len seriozno problemia , em ko than te del pe lenge suporto , buteder romane političaria si konektirime ko konfliktoa thaj korupcia. O legaripa taro Orban dela panda pobaro motive akale anomalienge, hramosarela o DW.
O delegatoa zoraleste ćhinavgje I diskusia e diskutanteske, hutinen sine, em keren sine incidenti te avell dži ko maripa. Akava sine ko 31 januari 2022 ko mitingo taro Nacionalno legaripa e Hungariakere Roma (ORO).
O mitingo sine sar agorutni šansa te alusarel pe kandidati so ka representirinel e Romen ko Parlamenti so si niami sakone minjoriteteske an I Ungaria.
Kana o mitingo agorkerel sine ko 23:59 o časo, sine klar kaj o kanonikano tajmingo nakhela thaj I Oficialno Romani grupa nane te alusarel pire romane kandidate ko avutno hungariakoro Parlamento.
Akava si jekh taro pobuteder konfliktoa so si lungo vakti an I akaja romani asociacia. Tari jekh rig si I romano NGO ternengiri asociacia Firos, a avere rigatar I organizacia Lungo Drom so beršencar dela suporto e premiere Viktor Orban. O duj da organizacie mangen te čhiven pire candidate ama ko agor nane te ovel ni jekh.
