I Fondacia Otvoreno Opštestvo Makedonia (FOOM) arakhlja donacia taro 100.000 dolaria urgentno humanitarno s intervencia ko majteleperavde romane familie so si socialno em ekonomsko majdirektno targetirime e sastipaskere krizaja.
– But si importantno ko akala momentia te arakhel pe suporto e majteleperavde grupake dizutne prekal bajraripa o šajdipa te ikeren I higiena em dizinfekcia em prekal suporto hajbaja ko periodi tari izolacia.
Odoleske I Fondaciua barabutne e Lolo Krisea tari Republika Utarali Makedonia kergja humanitarno paketia hajbaja em artiklia higienake so si periodeske taro jekh masek te šaj te ovel olen jekhe familia taro štar dži ko 6 džene vakeren tari Fondacia.
O aktiviteto astarel paše 10.000 dizutne tari romani jekhin jali paše 2.000 familie so dživdinen ko Šuto orizari, Tetovo, Gostivar, Bitola, Prilep, Kumanovo, Delčevo, Vinica, Pehčevo em gav Crnik.
I distribucia taro humanitarno paketi ka počminel taro tajsa em ka agorkerel dži ko 10 April akava berš.
– Te šaj I akcia džal bizo prolongiriba o Lolo Kriso ko teren ka kerel kolaboracia šov NGO romane organizacie kaste aktivitetia si pendžarde ki romani jekhin – Romano čačipa, IRIZ – Skopje, Sonce – Tetovo, Stanica P:E:T: – Prilep, NRC –Kumanovo. NVO KHAM – Delčevo, HOPS – Skopje em Centro e čhavenge pe droma – Šuto orizari. So ka keren identifikacia e teleperavde romane familenge em ka den suporto ki distribucia e humanitarno paketenge , akcentirime si ki vaktavin.
