I Selma Selman , bosanskohercegovsko romano umetniko lumiakere rangoa so dživdinel thaj si aktivno ko Njujork , počmingja nevo proekto te del suporto ki edukacia e romane čhijenge tari BiH. Ko pervazia e fondaciake “Marš ki škola” trinto berš khedela lovee romane čhavenge taro Bihač mangipaja o aktiviteto te buvljarel pe.
O proekto “Get The Heck To School/Marš ki škola” mangel te bajrarel o numero e čhavengoro tari akaja marginalno grupa ko škole thaj sar so vakergja i Selma olakiri mangin si o akanutne 15% so džana ki škola te resel dži ko 95%
I Selma vakergja kaj o trin majbare problemia so si asavke situaciake si
Tikno procento so džana ki škola, o prandina ko tikne berša ki romani populacia thaj i diskriminacia e romane čhavenge ko sasoitnipa.
