Ki avutni statistikani operacia – Hramovipa e dizutnenge o manuša so si an i diaspora ka šaj te oven registririme salde sao i notacia taro membria tari majpaše familia.
Ola ka prezentirinen olengoro personalno ID numero thaj an i odoja forma ka šaj te zojrakeren kaj si dizutne an i Makedonia.
I informacia vakergja la o vicepremiero Bujar Osmani thaj odova si majpakjavutne o kompromiso kana anglutne sine notirime kaj ka ovel thaj grafa bašo etnikano preperutnipa.
Agjaar udžarel pe kaj ka ovel faisali e problematično pučiba so ačhaval sine o proceso sar ka registririnen pe amare manuša tari diaspora.
So legarel pe aso o kanonia baši statistikani operacia -hramovipa, o Osmani vakergja kaj o Govermento ka identificirinen pe o fundavutne principoa. Ov dophergja kaj ka identificirinen pe nesave tehnikane detalia, palo so o kanonia trubul te ovel dendo an o Parlamento vash oleskiri akcepcia.
Akaja statistikani operacia -hramovipa ka ovel kerdi taro 1-to dži ko 21-to april 2020 berš . O agorutno sine realizirime an o 2002 berš thaj sine but debate an i konekcia bašo procento taro dizutne an i them tari etnikani nukta.
Sine ko jekh thaj statistikani operacia – hramovipa an o 2011 berš , numa sine stopirime ko agorutno dive tari oleskiri implementacia. Vash eventualno džovaplipa soske si stopirime phravgja akti thaj o Specialno kriseskoro ofiso.
