O phanle an o phanlipa “Idrizovo” an o Skopje roden te oven akceptirime aso o havljardo kanoni baši amnestia olengere krisoskere decizienge vash o aktia an o Parlamento taro 27 april persi berš.
Pobuter taro 600 phanle štrajkujnena bokhalipaja thaj esapinena kaj ola da trubul te oven amnestirime notirinena taro akava phanlipa.
O phanle na mangen te han thaj havljarena kaj akava rodaripa an o sig vakti te avel anglal o Govermento em ka protestirinen olengir membria tari paše familia.
Taro phanlipa “Idrizovo” zojrakeren akaja informacia thaj vakeren kaj paše 60 – 65% taro phanle na mangen o hajbe thaj an o momenti keren pe medicinakere kontrole e phanlelnge.
Sar so vakerena taro o Ofiso e phanlipaske, vakergje kaj akava štrajko ka ovel duj divesa.
