O deputati thaj lideri taro PCER o Samka Ibrasimovski akana ko sig kerdo pres e žurnalistenge vakergja kaj na respektirinen pe o konkursia ko themakere institucie ko bukjarnipa e Romenge. Ov vakergja nekobor egzamplia kote i them našlja tari savala – obligacia kote si zagarantirime o bukjarno than Romeske t, a čhiven avere naRom ko oleskoro than.
Numa akana an o anava akale reakcienge thaj notacie del pe pučiba si li o korkoro Romane političaria so si an o funkcie aktuelno isi len li kontrola ko, kobor thaj kote si o Roma an i buti?
Si li e romane političaren pire anglokolaciono kontraktoa an i konekcia bukjake thaj aver jali mukhen salde kana ka avel bukjake vakti “pire manušen” thaj te na sine sar so trubul tegani te keren reakcie?
Trubul li o romane reprezentia te keren reakcia kana isi salde savke bukja jali te keren reakcie kana si lafi bašo sa i Romani nacia thaj olengoro bukjakoro angažmano.
Akava ko jekh sikavel i percepcia taro olengoro “interes e Romenge” kobor ola e Romen “ferminena” thaj e romane političaren.
A trubul tegani o romane politikano bloko te “steginen” akava segmenti a na te reagirinen salde kana isi len “individualno” hairi. Ko jekh o romane politikane partie ma te keren aktiviteto kana trubul andrune partiakere strukture bašo funkcie thaj pozicie soske o vote -glasia resen taro narodo an na taro partiakere membria.
Trubul te “phraven” jakha thaj te keren mariba bašo kvalitetno thaj saste proektoa em iniciative kote trubul o korkoro političaria te keren afirmacia ko than salde ” šukaripaske an o kher” te trainen , a na salde “epizodno” te keren reakcie em te sikaven pe “heroia” salde ked isi len desavo benefiti.
