E Hitlereskoro akcentirime pobaro phral OTO , čačutne ov sine majterno taro Hitler thaj mulo nekobor divesa sar biandilo. Akava fakti akana inicirinel pobuter pučiba, numa o majimportantno siu savi presia kergja ki psiha taro lideri e nacistikane Germaniake.
Pakjala pe kaj o Hitler sine štarto taro sa 6 čhave , numa o informacie taro Braunau , o biamo than taro Hitler so si biamo na o 20 aprilo 1889 berš notirine kaj ov sine trinto čhavo – vakerel o historičari Florijan Kotanko e gazetake “Oberoesterreichische Nachrichten”.
Opservacia ki dizjakiri arhiva thaj dokumenti notirinen kote sa o informacie si palo odova palem hramosarde neve numa navalidno.
O Oto Hitler , o phral taro Adolf biandilo trin berša palo Hitler ko 17 juni 1892 berš . Mulo palo šov divesa taro hidrocefalus jali gogjakiri anomalia – vakerel o Kotanko.
I konkluzia taro buteder Hitelereskere biografičaria bašo mentalno situacia taro Hitler si kote ov sine majmanglo pe dajake i Klara, sar jekhutno dživdo palo meripa taro olakere javer 4 čhave, akana nane pobut validno – notirinel o historičari.
“Savi sine i reakcia taro trinberšengoro Adolf Hitler palo bianipa thaj o meriba oleskere phraleske? ” pučela pe o Kotanko , soske dikhela pe kote si importantno bašo majodorigutni situacia e Hitlereske thaj oleskiri psiha.
“Sine li svesno bašo odova nasvalipa?. Sine li mentalno presia palo odova ko oleskoro dživdipa thaj oleskiri percepcia premal o manuša so sine len desavo hendikep?” pučela pe o Kotanko.
