Šudre, bokhale bizi elektrika thaj bizo pani ko -15. Agjaar i familia Ramadanovi taro Skopje nakhavgje i majšudri rakj akava berš. I Suzana thaj o Neđati si len trin tikne čhave so dživdinen an o phagerdo kher ko pašipa taro Kliničko Centro . Nane len kašta an o šporeti thaj tharen purane šea te šaj ovel hari tato kote hana thaj sovena. Majpahreste si kana i daj trubul te thovel šea.
-Akana isi iv khedingjum ko iv te bilandol em agjaar thovav sine ošea. Šudro si , čhivav sine purane šea , plastika thaj kartonia te takjova hari. Rakjate tharaja momolja , vakerel i Suzana Alčinova.
Lena love socialno bašo trinto čhavo em podisavo drom kana akharen le bukjake e dade so lela po desavo drom 200 -300 denaria. Kana nane len hajbaske džana an i majpaše khangiri.
“Dena amen o komšie šeja, hajbe , pani pherav taro aver khera . O čhave rodena kana si man kinava , kana nane… vakerel i Suzana.
O majbaro čhavo si le 8 berš numa na džal an i škola.
“Školake trubul šea a na agjaar sar so si akana” vakerel i Suzana.
“Mangav te džav an i škola, te ovel man amalinja, vakerel i tikni Razia.
I Suzana vakerela kaj rodingja suporto taro Ministeriumi baši sociala numa panda nane nisavo antvorto olendar. Avdive jekh paketi artikloncar abgje tari ekipa taro Lolo kriso.
O ramadanovi duj berša si an o akava kher kote o gazda e khereske mukhlja olen te dživdinen momentalno odothe. Ko anglo nilaj ka trubul te peraven o kher thaj akaja 5 dženengiri familia ka ačhol pe droma.
Link: https://www.youtube.com/watch?time_continue=1&v=lA3IZpg-RAs
