Kana kerela pe lafi bašo fudbali odava asocirinela kaj si muršano sporti so šaj salde o murša te khelen le, numa akaja Romani čhaj i Esmeralda Osmanovič si čhaj so peravela odala stereotipia thaj sikavela kaj akava sporti nane salde e muršenge, numa šaj thaj o džuvlja te khelen le.
I Esmeralda Osmanovič si tari diz Travnik an i Bosna thaj Hercegovina thaj an o fudbalesko stadionia si 5 berš thaj isi la šular rezultatia, dzi kote so lakiri mangin panda taro tikne berša sikavgalake o mangipe prema ko fudbali khelibaja panda ko droma e čhavencar.
„Isima 18 berš thaj trenirinava fudbali taro mire 13 berš, panda sar tikni khelava sine fudbali me phralencar thaj e čhavencar ko droma thaj odava sporti panda taro sa vakti sine mange but paše“ vakerela i Esmeralda Osmanovič.
Oj akana khelela bašo klubi ŽFK „Rosa Brandis“ an i diz Travnik thaj lakoro than ko tereni si ofanzivno konekcia.
„Khelgum thaj an o aver klubia, numa akava klubi si so me arakljum man thaj sium čali tari miri pozicia“ vakerel i Osmanovič.
Oj notirinela kaj o fudbali tano lakoro avutnipe thaj dikhela pe sar sukcesivno ko adava.
„Keda ačhovava korkori ko 4 duvaria gndinava bašo avutnipe thaj avgo buti so perela mange an i godi si kaj mangava te kerav odava me so mangava le but, sar sarine odava so kerena, a odava si mange o fudbali“ liparga i 18-to beršengiri Romani čhaj.
Palo o phare treningia oj na mukhela em i edukacia, thaj trujal so o fudbali si olakoro avutnipa oj ko jekh but educirinel pe.
Gndinela kote o dzuvla valjanena te keren but ko educiribe thaj te sikljoven thaj te peraven o stereotipia bašo kova si kerde, sar so si kaj o dzuvla nane samo te bijanen thaj te keren hajbaske, te čistinen thaj javera dzuvlane buka, nego ola valjanena but buka šaj te khelen fudbali da jekhutno barabar sar so si o murša da.
Esmeralda Osmanovič bičhavela apel e ternenge te ikerenpe an o sporti thaj o manuša na vakerena dzabe, sasto badani sasto ruhi, te keren buti bašo korokri peske, lengere ambicie thaj rezultatia so odolea o sukcesi ka ovel zagarantirime.
