Nikana nadžanea so ka anel tuke o dživdipa. Nesavo drom šaj ove upre, a podesavo drom em tele vakerel piri storia akaja tikni terni romani čhaj taro Skopje.
„Kana sium sine tikni mo dat thaj mi daj keren sine buti. Tegani dživdina sine sar buteder Roma an i Makedonia. Na sine amen but numa sine amen jekh normalno dživdipa. So sine majimportantno sine amen kher.
Numa sar ko sako kher agjaar amende da ulo odova. Mo dat em mi daj ačhile bizi buti. Dživdina sine taro love so lel sine mo papu, so kerel sine ko podrumi buria thaj bikinel sine len. Numa ov palo odova mulo thaj amen ačhilem bizo ništo.
Me džav ani škola. Isi man panda duj phenja em jekh potikno phral.
Mire jeria arakhen sine nešto te anen khere.. keren sine buti so ka arkahen. Na ladžana sine. Počmingje te kheden sastrn, plastika em bikinena sine. Mi daj po desavo drom čistinel sine khera kana ka akharen la. Na sine amen fundavno elementia dživdipaske.
Ki sasto pharupe problemi sine so mire amala an i škola. Ola sako dive asana mange sine soske sium čoroli, em me dadeske so khedela sine sastrn em plastika ko droma.
Vakeren sine kaj sium gubradžika, kote khandava thaj aver bukja.
O profesoria nikana na ačhile pali mande te braninen man. Sako dive kana džav an i škola darava. Me džav angle numa o pire iranen man napalal. Numa sako drom sium sine me odoja so asana mange sine. A na sium bilačho siklo. Vakerena mange kaj našavav mo vakti so avav an i škola kana šaj te ovav ko droma, kote si mo than , a na an i škola.
Me naladžava taro mire jeria, numa mire amala keren horo ko mo dživdipa. Na mangav lenge bilačhipa, numa te džanen kaj o dživdipa si rota -iranel pe.
