O generalno direktori an i Direkcia e EU vash lafikeriba ko buvlajriba thaj paše politika o Kristijan Danielson notiringja kaj i inkluzia e Romenge si jekh taro prioritetia an o kontekst i Srbia te ovel majšpaše an i EU.
Ko vakti taro oleskoro leiba than ko časo pali romani čhib an i FŠ “19 Oktomvri” ko gav Maršić – Kragujevac, o Danielson akcentiringja kaj i edukacia si o nakhtari an i inkluzia e romane jekhinake.
– Bahtalo sium so amare sbiakere partenira kergje čhani te sikljovel pe i romani čhib – vakergja o Danielson sikavibaja čalipa taro rezultatia taro proekto “Sikljojbe romani čhib elementencar tari nacionalno kultura an o fundavutne škole” kote o EU del suporto.
E dizjakoro šerutno taro Kragujevac Radomir Nikolićnotiringja kaj akava proekti ka anel arakhiba e romane čhibjake thaj kulturake thaj ka lačharel o kvaliteti dživdipaske e Romenge an i Srbia.
I menadžeri e proekteske an o proekti ko sikljojbe romani čhib ko škole o Ljuan Koka akcentirinela kaj o proekti realizirinel pe ko 75 škole ko 43 komune an i Srbia thaj 3.000 sikle dengje propozalo kaj kamen te sikljoven i romani čhib.
Ov dopherela kaj udžđarel pe start taro štampiba romane lila bašo čhave so džan taro 1 dži ko 4 klaso ki škola.
O edukacia an i romani čhib ka realizirinel pe ki FŠ “19 oktomvri” duj časia ko kurko baši 30 čhave taro 1 dži ko 4 klasi.
