Ko thavdipa e alusaribaskere kampanjenge an o Lokalno alusariba 2017 berš ka ovel lačhe te keren pe paralele an i konekcia e numerencar so sine an o vakti e lokalno alusaribaske angleder 4 berša an i komuna Šuto Orizari.
Aso o numeria ko persi lokalno alusariba an o Šuto Orizari registririme hangutne sine 21.489. Barabutne sine 19 alusaribaskere thana.Olendar ko hangiba iklile 48,84% jali barabutne 10.495 hangutne.
Taro duj teganutne romane kandidatia e funkciake dizjakoro šerutno , o Elvis Bajram taro SRN reslja 6.067 hangia, a o Neždet Mustafa taro ODSR 3.283 hangia.
So legarel pe dži ko hangiba e Komunakere Konsuleske aso o hangia o SRM resle 5.400 hangia (55.96%), a o ODSR 2.121 (21.98).
Sar ka ovel akana i paralela maškar o duj kandidatia o Elvis Bajram taro SRM thaj Kurto Duduš taro SDSM ka ovel pendžarutno an o 15 oktomvri jali eventualno ki dojto rota palo 29 oktomvri.
