An i Srbia baro numero taro dizutne so nikote nane evidentirime thaj nane len nisave niamia. Bizo dokumentia si thaj o Roma taro Kosovo so iklile odothae, o čorole Roma taro utar e Srbiake thaj našti te educirinen pe.
Ni jekh nadžanela kobor apartridia isi an i Srbia, manuša bizo matično numero, personalno karta, themutnipa, adresa thaj sastipaskiri protektiva trujal so akava problemi so trubul sine te faisalkerel pe panda an o 2015 berš.
O notacie si kote paše 7 procentia taro Roma, Aškalie thaj Egipkjania em majodorig nane len dokumentacia, a 6% taro olengere čhave nane identificirime an o matično lila.
Maškar ” niamale fantomia” isi but thaj taro raselime Kosovakere Roma kaskere matično lila si zijankerde , a o dokumentia našavde, thaj asavki situacia si ko utar e Srbiake.
O reziltatia taro rodaripa sikaven kaj sastipaskiri legitimacia nane 29% Romane džuvlja, 27% Roma thaj 23% čhave.
Sar faktori akaleske si so nane len personalno dokumentacia so trubul te ikavel pe sastipaskiri legitimacia thaj o čhave kaskere jeria nane sigurime. Olen si len salde primarno sastipaskiri protektiva a na sekundarno. Odova sikavel kaj našti džan ki operaciakiri intervencia jali aver analiza thaj sasljariba trujal te pukjinge privat.
