Ko vikendia trujal o kurko zarzavatenge an o Skopje isi but so bikinena emiši, zarzavati, čaj, thud an o plastično šišia, rakia, lulugja a neko sostejna em majce. Numa ko agorutne kurke isi akcie taro paldiba . Aven inspektoria thaj policajcia thaj o manuša so bikinena majsig jhedena pe našena pe gonoencar.
Numa na chiden pe ko momento. Ola udžaren te šaj palo odova te iranen pe. Numa nekaske resel thaj globa taro 100 eura.
O nalegalno pazardžie si bibahtale thaj darana taro inspekcisko kontrole, a o legalno pazardžie pukjinen i tezga thaj vakeren i nalojalno konkurencia te chiden la anglal lende.
O pazardžie so bikinen paprike thaj domato an o tezge andre ko kurko vakeren kote nane fer o maro len lendar okola so bikinen majeftino soske nane len takse.
– Ko Zeleno pazari o tezge si paše 80 eura . Si amen kontrole , baždarina e vagenge thaj akava amenge si sar profesia. Odoleske i them trubul te iranel i sama amare profesiake te ova protektirime taro akala nalegalno kali ekonomia. Akava si amaro bukjarno than thaj nane amen aver thaneste kote te dža.
O nalegalno pazardžie si lungoberšengoro problemi e Skopjeske thaj aver dizjende. I nalegalno ekonomia kotorvale faisalkerel o socialno problemo numa ko jekh kerel ziani okole manušenge so pukjinena tezge. Numa o love taro tezge džana an o budžeto e privatno kompanienge , so palo odova indirektno prekal takse thaj bukajrne si len akcia ko themakoro konto.
