An i bugarsko diz Asenovgrad trinto dive si sar si o protestia taro etnikane Bugaria mujal o Roma tari romani mahala an i diz.
Sar faktori e protestenge si kote sine marde nekobor terne bugarsko sportistia tari grupa terne Roma
Aso o informacie o konflikto sine kana duj čhija tasljona sine ki paše len thaj den sine vika, tegani o terne Romane čhave khuvgje te ikaven len taro pani , avile nekobor terne Bugaria thaj akušen sine e Romen lafencar: ” Tumen o melale Roma li ka den suporto, džan khandena but” so palo odova alo verbalno konflikto maškar akala duj grupe kote marde sine o terne bugarsko sportistia.
Palo akava konflikto jekh grupa taro bugarsko dizutne gele ki romani mahala te maren pe odole grupaja.
Palo odova sine akhardi i policia so barabutne trinto dive akana arakhena i romani mahala taro demonstrantia so vakeren kaj ola keren tromale protestia, numa hohavnipaske sikavgje pe sar zorale so mangen te nakhaven o kordoni thaj bičhaven agresivno mesažoa e Romenge thaj rodena te džan peske tari odoja romani mahala an o Asenovgrad.
Akanaske sa e policiakere ekipe arakhen i romani mahalka o manuša našti ikljov thaj khuven an i mahala thaj našti keren piri sakodiveseskiri buti , sar so si te džan an i buti, škola, doktori thaj avera aktivitetia.
