Ko odola purane vaktia an o eftato del dživdinel sine o baro thaj majzoralo Penga, thagar sa e Romengoro. Duj parne grasta legaren sine i somnakaeskiri araba . O Penga agjaar barvalo thaj baro ov na sine thagar salde e Romenge numa thaj e averenge. Sebepi o baro barvalipa, na kerel sine buti , numa sasto dive ple arabaja džala sine pe čhavencar ki somnakaeskiri araba.
Numa jekh dive phagili i rota taro somakaeskiri araba thaj savore pele an i phuv. Bešlja o Penga telal jekh kašt udžaribaja o izmekjaria te resen te vazden le thaj te iranen le an i palata. O Penga adžikerel sine, o čhave adžikeren sine, dive,duj, trin – numa na avile niko. O kham pekel sine. Taro kham o Penga thaj o čhave kalile.
Avilo nesavo gavutno , nadžanlipaja kaj o Penga si thagar thaj Devel počmingja te del čhingar pali leste:” Na dikhe li korolea kaj o čhave pjiren ki mli niva?” Akde džan tumenge ma te dikhav tumen majbut”.
O Penga manglja te vakerel so ulo olea, numa o gavutno namanglja te šunel.
Manglja jali na o Romano Devel thaj thagar khedingja e čhaven thaj gelo te rodel i palata . Numa odova so ka našave jekh drom, phare si te irane le . Phirel sine po droma. pučel sine, rodela numa na kergja khanig.
Kana o Penga dikhlja kote na legarel khanig odova , khedingja pe čhaven thaj vakergja olemge: “Šunen mire čhavalen, amen našavgjem o thagaripa. Akana siam čorole! Numa trubul te ha an o amaro dživdipa, te kera buti soske khanig na perel upral! Odoleske jekh tumendar ka ovel kovači, odova si lačhi profesia thaj šaj te ovel lačheste. Aver te ovel muzičaro, soske o manuša mangen gilja”.
Agjaar o Penga sakone pire čhaveske dengja po jekh zanato. Avilo o niče e duj maktikne čhavenge. Ola na mangen sine nisavi buti. E pengaske pelo mazunipa so si bizo zanati thaj vakergja olenge: ” Tumen sien mire čhave thaj na mangav te den man arman kana ka merav. Odoleske jekh tumendar ka lel gono te mangel devlenge ma te ovel bokhalo , a o aver… (akate o Penga hari ačhilo so te del le, soske na sine khanig), em agjaar bešel sine paše jekh veš kote iklili jekh mečka thaj vakergja leske: Ake tuke amal tuke. Le e mečka thaj dža laja an i lumia. Oj ka del tut hajbaske, em tu olake!
