I bari jag si ačhavdi, numa o problemi e deponiaja panda si aktuelno. Beršencar khedel pe sine gunoj tari sasti Struga našti te nakhel pe prekal i rakj. I nalegalno deponia si dur salde nekobor šel metria taro majpaše khera so dživdinen o dizutne tari Struga.
Ki odoja kupa si čhudimo sa. Purano membeli, medicinsko gunoj, mule hajvania, plastika .
I Deponia buvljarel melali sung an i Struga thaj si agjaar 10 berša. Lungo si 700 metria, buvli 300 thaj uči 13 metria. Ko beršeskoro nivelo olate čhudena pe 130.000 m3 gunoj.
E deponiajaj an o 2014, 2015 thaJ 2016 berš kerel buti i firma D&B grup 2013 DOOEL . Odolea ko akala trin berša profitiringja 200.000 eura.
Ko učipa e baireske taro gunoj so si ko nekobor lokacie, pobuter Roma khedena thaj selektirinena plastično šišia. Vakerena kaj ola akate avena sako dive khedena i plastika, selektirinena la thaj palo odova bikinena la.
I deponia e stružanconge bari bibaht, numa e Romenge so aven akate tari sasti Makedonia em tari Albania si than kotar ikavena piro maro . Ola džanena kaj si baro riziko so keren buti an i akaja deponia numa aver opcia nane olen. Nane len buti thaj trubul te dživdinen taro nešto.
О Ministeri baši ekologia thaj bizo resoria avena an i Struga te šaj den suporto te arakhel pe faisali e deponiake. Numa akanaske nane nisavo faisali. O dizutne tari Struga keren protesti thaj vakeren kaj šaj te radikalizirinen pe dži kote na arakhel pe nevi lokacia e deponiake, a akaja te ovel phanli.
Youtube: https://www.youtube.com/watch?v=5RxHnU6EZwc
