Pharo incidenti an o štipsko ortopedia. Bukjarno margja manuše so alo an i vizita, kana akava rodingja te del pe suporto phare nasvale pacienteske vakerel o manuš so sine atakujme.
Avilo thaj počmingja te khuvel man boksea an o muj thaj teleperavela man sine, mange ulo bibahtale, uštilo mo šekeri ko 27 thaj dengje man infuzia, vakerela o Adem Čengaroski o atakujmo manuš.
Akale incidenteske kerel pe kriseskoro akti mujal o bukjarno:
Aso mande akate isi sa o elementia taro kriseksoro akti, faktea kaj kerel pe lafi bukjarneske an i akaja institucia ko vakti bukjake, šaj trubul te intervenirinel thaj o obdusmano vakergja o Ajsel Ahmedovski advokati.
O incidenti anglal o hospitalo avile thaj nekobor NGO organizacie:
Majmujal siem akale incidenteske thaj akava si ladžavo e hospitaleske, vakergja o Zoran Bikovski taro NGO KHAM – Delčevo thaj o Erol Ademov , tari Asociacia multietnikano sasoitnipa -Štip.
Akava si trinto fizičko incidento ko akava hospitali odoleske o NGO havljarena te rodel pe džovaplipa taro menadžmento e hospitaleske.
Akava neka ovel sar jekh vaktavin savorenge an o hospitalo soske si la bilačho imidži , a i higiena šaj te konkururinel sar dizjakoro WC vakergja o Zekit Abdulov taro NGO-KHAM, Delčevo.
Aver rigatar o hospitalo iklilo pire vaktavinaja so vakeren kontra:
Amaro bukjarno personali sine atakujme tari rig manušeske so avilo an i vizira avri taro bukjarno vakti vizitake. Zorea khuvgja ko odeli thaj kergja atako upral amaro bukjarno vakergja i Elizabeta Paparova, direktori an o Kliničko hospitalo an o Štip.
Ko akava incidenti an i policia sine notirime tari rig e Čengaroski , dži kote aso o menadžemnto an o hospitalo , sar so vakeren kaj atakujme sine o bukjarno panda na notiringje akava akti an i policia sebepi sastipaskere problemia.
Link: http://www.televizijastar.com/
Youtube: https://www.youtube.com/watch?v=dPnnX24AYn8
