E Romen nane len piri them, thaj si sakote an i lumia. E Romen si len himna, flago thaj barvali tradicia. Majbaro numero Roma isi ko europakere thema. O Roma si bukjarne, lošale, i muzika si an o ilo. Ola si talentirime manuša.
Ko nakhlo periodo majbut taro ekonomsko faktori na sine len šajdipa te educirinen pethaj keren sine buti te šaj dživdinena. Avdive odova si irame sebepi stipendie thaj aver te šaj vuvljariba thaj integracia e Romenge an o sasoitnipa. Numa i agorkerdi edukacia agorkerne o problemia da? Si li akaja misia sukcesiale agorkerdi? So ovel majodorig?
O sistemi an i amari them si asavko so sp dži kote politikane- partisko na sian hulavdo tikne si o šanse te khuve an i buti thaj te kere kariera. Ko odova momenti dikhea kaj oi egzistencia nane agor ki savo bilo forma jekhutne faisali avela kaj trubul te astare desavi politika rig thaj te astare bukjakoro than te šaj te ovel tut desavo dživdipa. Ki paralela, e familiaja thaj avera so dživdinen avrial tari them dikhen pe o diferencie ko leiba love thaj o aver akomoditetia so dela odoja them.
Odothe ikljola revolti thaj sa buteder terne Roma dikhen piro avutnipa ko odola thema. Džanlipaja kote avrial ko thema ka čaljaren pire ambicie thaj ka ovel len majbaro progresi ola anene decizia te džan ko odola europakere thema mabut ikavibaja tiketo ki jekh rog bizo iraniba.
Akava si salde jekh tikno kotor taro faktia soske o terne džana peske tari amari them. Odova si realno thaj faktičko momenti. Aso odova but terne Roma da thaj phurede rpiro avutnipa dikhen an o majsiguritetno euroopakere thema.
Vakeren kaj si majšukar te ove tuke khere uzal te majpaše te dživdine ko than kote so bariljan te oven tut tire amala taro čhavoripa te kere tli dajakiri čhib numa kana jekh terno manuš našti te resel piro prioriteti o patriotizmi merel pohari a o lačharipa rodel pe avrial tari Makedonia. I situaciua so si si čačutni thaj dikhuavni numa bibahtalipaske but realno.
