I Makedonia si jekhutni them an i Europa so 15 berša na kergja statistikano gejniba e dizutnenge , statistikani operacia so si importantno sakone themake.
Aso o rezultatia tari akaja statistikani operacia keren pe lungovakteskere plania odoleske kobor gartenia. škole, ambulante thaj aver proektia trubul an i jekh them.
Kote akaja statistikani operacia si importantno sikavel o fakti kote i Populaciono komisia an o Unime Nacie bahamkergja sebepi komparacia taro informacie, o hramosariba ka sikaven pe ko agor sakone dekadake jali ko starti e avutne dekadake.
Numa an i Makedonia akava statistikano gejniba si sar tabu tema. Pobute gndinena kote an o momenti majimportantno si te kerel pe o Govermento a palo odova te kerel pe diskusia akala e statistikane operaciake.
O agorutno statistikano gejniba sine an o 2002 berš thaj taro tegani sine kerdo salde jekh drom akcia te implementirinel pe akaja statistikani operacia thaj odova an o 2011 berš numa o procesi sine čhinavde palo aplikacia kolektivno ostavka e hramosaribaskere komisiatar.
Aso o agorutno statistikano gejniba an i Makedonia isi 2.022.547 dizutne. Taro sasto akava numero 64,18 % si Makedoncia, 25,17 Albancia, Turklie 3,88, Roma 2,66, Srblie 1,78, Bošnakia 0,87 thaj Vlahia 0.48 procentia. O procento taro albansko dizutne an i Makedonia taro sako drom sine tema an o diskusie maškar politikane partie taro diferentno blokia. Majpakjavutne an i akaja tema ka diskutirinel pe panda lungo vakti, sa dži ki avutni statistikani operacia.
