I terminologia ” Gypsy” si anglikani thaj istemalkerel pe akale bare grupake manuša taro etno-lingvistikano karakteri , numa i them kotar aven India majanglal sine anavkerde sar Dom, so si “manuš”. Palo odova Dom buvljargjovel an o Rom. Avdive o Roma kamen te oven identifikujme sar ROMA an i Europa, numa an o Paše Purab thaj Utarali Afrika, buteder olendar si anavkerde sar Dom. I terminologia Dom istemalkeren akale grupa naciake an o Paše purab so asocirinel len kaj si “Gypsy” thaj si karakteristika saste naciake. Aver anava so den pe e Romenge an o Paše Purab si, Barake, Nawar, Kaloro, Koli, Kurbat, Ghorbati, ЈАТ / Zott, Çingene, Mıtrıp, Qurbert, Gevende, Abdal, Zargari thaj Karaçi … O Roma aven tari India thaj si an i sasti lumia ko pobuter taro 40 milionia Roma.
Trujal i džanli historia tari diskriminacia so si pendžardi an i Europa, ola ko Paše Purab ačhile 2 dži ko 3 milionia Roma.
Avdive i jekhin anavkerdi sar DOM si len an o Paše Purab ko thema sar so si Kipar, Iran, Irak, Siria, Liban, Jordan, Izrael, Gaza thaj i Paščimali kinara tari Turkia. Trubul te kerel pe rodaripa te zojrakerel pe o čačutno numero taro odova kobor Roma – DOMa isi an i Saudiakiri Arabia, Kuvajt thaj Unime Arabiakere Emiratia. Numa mazunipaske našti arakhen pe čačutne relevantno informacie kobor isi Roma an o akala thema
